03/04/2013

عمر السجن ماغير فكره

محمد مصطفي مش بلطجي
بقلم : المدون / كريم الشاعر


محمد مصطفي مش بلطجي - محمد مصطفي مش فلول - محمد مصطفي شارك في صنع ثوره أطاحت بمبارك ونظامه - محمد مصطفي إدي صوته لمرسي علشان ميسلمش البلد لنظام مبارك مره تانيه .
محمد مصطفي مقبوض عليه من أمام بيت وزير الداخليه لما كان بيشارك مع زمايله من حركة 6 ابريل في فعاليه تطالب بحق الشهيد جيكا ، النيابه ادته اربع ايام علي ذمة التحقيق وجددتله 15 يوم ولما زمايله استئنفوله اترفض الاستئناف ورجع السجن يكمل الـ 15 يوم .
محمد موظف في شركة بترول ومتزوج وعنده بنتين زي القمر الأولانيه جني عندها خمس سنين والتانيه لوجي لسه مكملتش شهر يعني ملحقش يشبع بيها ، محمد بيقضي شغله برا القاهره لمدة 15 يوم ولما بيرجع بيسيب شنطته في البيت وينزل يشارك في فعاليات الحركه وبيقضي اغلب وقته مع زمايله لإنه مقتنع بدوره اللي هيعدل المايله يعني كمان مش بيدي لبيته حقه علشان خاطر حبه لبلده مصر .
محمد كان عضو في حركة كفايه وشباب من أجل التغيير وشارك مع شباب كتير كسروا حاجز الخوف في الشارع سنة 2005 لما كان لسه نظام مبارك بجبروته أه صحيح محمد متحبسش كتير ايام مبارك لكن سخرية القدر خلته يتحبس في عهد مرسي اللي اداله صوته علشان يحافظ علي ثورته ، يالسخرية القدر .
النهارده محمد مصطفي هو ورفاقه زيزو عبد وأبو أدم بيدفعوا ضريبة الحريه في سجون مرسي كل ده علشان طلبوا حق الشهيد جيكا ، كل ده علشان بيدوروا علي عيشه كريمه ليك ولأولادك ، كل ده علشان هما بيباتوا في الشوارع يدوروا علي حقك وانت نايم في البيت ، أعتقد إن الدور جه عليك علشان تنزل تجيب حقك بنفسك وتحسس الناس اللي اتحبست ان تعبهم مارحش هدر ، إسترجل وانزل يوم 6 إبريل من أجل العيش والحرية والعدالة الإجتماعية والكرامة الإنسانيه .  

Comments

الحرية لمحمد بإذن الله ربنا يفك حبسه

Posted by: solidworks tutorials | 19/08/2013

Post a comment